Vief Veur Elf

Spiet

Vekaanzie

Josie

Wotter Noar Zee

Zundagmörgen

Mesienes

Aanders as Veurhèn

Noar Stad

Smokken Binnen Vergees

Twijde Hans

Kin Nait Sloapen

 

 

 

 

Vief Veur Elf

Aaltied vief veur elf
Netgeliek of t vandoage
Of veureg joar is

Aaltied vief veur elf
Sprutters in toene
En Jannie is dood

Komst nog noar hoes, jong?
Hebben die ja zo laank nait zain
Krigst vief euro veur traain

Aaltied vief veur elf
Klokke is al joaren
Stokkend in tied

Aaltied vief veur elf
Neem nog wat mit, jong
Wielu hebben genog

Komst nog noar hoes, jong?
Bist hier ja zolaank nait west
En dreumen kommen nait veurbie de nacht

Spiet

t Liekt schier n dag leden
Dat as zai zee mien laif ik wacht op die k Nait dacht aan die
Bin zoo voak noar die tou reden
Mit n pokkel zunder vlinders
Want dij kon k bie die nait vinden

Mor nou heb ik spiet
As hoaren op mien hoofd
Nou heb ik spiet
As bloaren op mien handen
Ik heb spiet tot in mien tanden
Dat ik die allinneg achterliet

En ik kin gain ain meer bellen
Want elkenain blift thoes
En zai kieken tillevisie
Mit zien baaiden in n snuggie
Noast de baank doar staait de buggy
Joggingboks aan kont

En ik wil wel op vakaanzie
Want doar bin ik wel aan tou
Mor t is apmoal al wel boukt
Mit kind kat hond en vraauw
Lekker all-inclusive
Mit joen ribben in e zunne op t strand
Roodverbraand

Mor nou heb ik spiet
As hoaren op mien hoofd
Nou heb ik spiet
As bloaren op mien handen
Ik heb spiet tot in mien tanden
Dat ik die allinneg achterliet
Dat ik die allinneg achterliet
Allinig en ook dakloos achterliet
Dakloos en ook zwanger achterliet

Vekaanzie

Zai is pas drijentwinnig, mor mit mie nog laank nait kloar
Ok al bin ik ainendattig, en heb t nog nait veurmekoar
t Kin 'r niks verschelen wat n aander der van dinkt
Nee t kin 'r niks verschelen, want t eerste wat ze zee

Hey hey gaaist doe mit op vekaanzie
Allewel doe mie eiglieks pas kinst
Hey hey gaaist doe mit noar t aailand
En den goan wie romantisch in n tent
Hey hey gain zörgen om finansies
k Heb n kovver vol mit etendrinken mit
Hey hey gaaist doe mit op vakaanzie
Mit zien baaiden op vekaanzie noar zee

Zai het zokken vol mit zaand, en tent stört sikkom in
En kovvie het gain lak of smak, al dou k der n kilo suker in
t Kin 'r niks verschelen, wat of n aander 'r van drinkt
t Kin mie niks verschelen, want t eerste wat ze zee

Ik huif nait mit vlaigtuug
Den mit die bin k ja ok in e wolken, laif
Soms is dichtbie aal glad te wied vot

Josie

t Is haalf acht nog baalkeduuster
Buit de kaggel mor weer aan
Tegen kòlde kinst wel stoken
Mor der komt gain ènde aan

En de bus van haalf negen
Ridt liek veur dien ogen weg
Dag is gain twij uur onderwegens
En hest veur twinneg uur al pech

Josie, ze zeggen dat t beter wordt
Josie, ze zeggen dat t beter wordt
Ten minzent aanders wordt
Josie, ze zeggen dat t beter wordt
Ten minzent aanders wordt
Mor doe waist ok wel, ze zeggen ja zo veul

t Is ja doags allinneg regen
Hest gain dreuge droad aan t lief
t Is ja aalmor weer wind tegen 
Vroagst doe òf woar zummer blift

Even wachten tot t licht is
Tot gerdien nait langer dicht is
En de zunne weer in zicht is
Even wachten tot t licht wordt
Even wachten tot de nacht kort

Wotter Noar Zee

Zai heurt mien moalen weer aan
t Is nooit n keer goud
En dat t apmoal weer aanders mout
Zai loat t mor goan
Proat mit mie mit
Terwiel t glad aanders zit

En ik wait wel dat kloagen niks dut
En zai wait dat mie vroagen niks dut
Droagt wotter noar zee

Zai zugt mien drinken mor aan
Der is nooit genog
Veur n struul zunne aan locht
Zai loat t mor goan
En zinkt mit mie mit
Den t helpt aaltemit

Zai vuilt mien gontern wel aan
Veur slorren en slooien
En t laankwieleg knooien
Zai loat t mor goan
t Is ja wat t is
As der niks aanders is

Zundagmörgen

Zundagmörgen, schoelt nog stiltjes achter t dookgerdien
En niks is nog wat t liekt, we rekken tied as elestiek
Tot t ogen openbreekt

Zundagmörgen, letste dreumen drieven langzoam vot
Kovvie swaart en blaauwe locht, en alles wat doe zugst
Hest endelk bie mekoar

Dien ogen binnen n open bouk
Mit aine dij t leest

Zai kiekt in de zun
Tot t aal opnij begunt

Zundagmörgen, kraant van gustern nog laank nait oet
Leest van achteraan noar veur, holdt dag noch even boeten deur
As ofst nait beter wos

Mesienes*

Containers stoan in baarm
En kombain ridt hinneweer
En wie kieken noar zien piep
8 ton waaite wordt in ainmoal oetspijt

Stropaarsen begunt
As kombain aan t ènd is
Stropak van 500 kilo
Trekt gain mins op woagens

Hinneweer goan mesienes
Mesienes goan hinneweer
Tot middernacht

Trekkers zaaien kultie’n mit licht
van koplaampe liekoet
tot ze t laand spiernoakend omplougen

Hinneweer goan mesienes
Mesienes goan hinneweer
Tot middernacht

En wie kieken noar swaailaampen
Leste polderlicht is van mien bruier

Hinneweer goan mesienes
Mesienes goan hinneweer
Tot middernacht

*tekst Mesienes: Fieke Gosselaar

Aanders as Veurhèn

Kiek mie nait in ogen
Luuster nait noar wa'k die zeg
t Is meugelk nait logen
Mor dut woarhied ook gain recht

t Is apmoal nog van t zulfde
Zo op t eerst gezicht
Mor as ik in dien ogen kiek
Bin k ondertied de weg nait kwiet

t Vuilt aanders as veurhèn
Woar kommen wie weg, woar goan wie hìn?

Terwiel der niks veraanderd is
Veur zover ik wait
Bin wel bie die west vannacht
Mor bie die was ik nait

Mörgen wordt t beter
Want mörgen is nait vandoage
Mor doe waist der is gain ind in t zicht
As toukomst in t verleden ligt

Noar Stad

Kin wel zain dat t zummer wordt
Bloumen knappen glad oet knop
t Is wel doan mit vree in t nust
As zunne wolken openropt

Vogels moaren visken schoaren
En dan krieg k t slim in kop
Din mout mien koale ros oet schuur
En spring ik zo t zoadel op

Op fietse noar Stad
Tringelingelinge
Op fietse noar Stad

k Zai aigen Olle Grieze in e wiedte stoan
Mout eerstkans besloeten of ik binnendeur goa
Mor ach, gain jacht, t is schier as t is
n Omtocht as dizze zol mie ok niks doun missen

k Wait wel heul wis da'k mien fiets op slot heb doan
Mor ik zai hom ja naargens stoan bie kroug
Hai zol toch nait hier weer jat wezen
Aanders stoa ik hier om reden
Dat ik aaltied mit met mien doene kop
Vergeten heb wa'k heb doan

Smokken Binnen Vergees

k Vreet al weken macaroni
Schroap schimmel van mien stoet
Wor mit nije dag meer sprokkel
Zulfs mit lege buuts en pokkel
Gaait saldo achteroet

Zulfs bie voedselbaanke
Krieg ik nog gain krediet
En nog veur mien stamkroug opengaait
Is t veur mie al hoogste tied

Mor t kin mie niks verschelen
Want heur smokken binnen vergees
Al stoa k rooier din de brandweer
Hoagelbuien, snij en onweer
t Gaait aal fout
Lig ik waarm in heur aarms
Den is t aal goud

Krieg n haalve haartverzakking
Van dij vent van PTT
Heb de matte vol kevotten
Bie firma binnen zunder kloppen
Bin ik abonnee

Oooh k heb t mie zulf aandoan
Liekoet goan is mie nait touvertraauwd
Bie elke nije ofslag, twiefels in de kop
Oooh t zit mie in t bloud

Heb gain geld meer veur n rondje
En ik smook allinneg mot
Mor wie binnen der veur mekander
Dus ik drink aaltied van n ander
En houst mien ströt kepot

Twijde Hans

Geef niks om nije klaaier aan mien lief
En mien hoes staait rondom vol
Mit wat n aander nait meer wol
Ik kin mien kont nait keren 
En soms kin k der nait bie laangs
En ik zai gain haand veur ogen
Want mien bril is twijde haans

En ik wait nait wat t is
Is t vrouger dat ik mis?

Mien noam is Hans
Mor ze zeggen twijde Hans
Vind mien gold bie Mamma Mini
Den t verdaint n twijde kaans

Mien vraauw was vrouger mit mien kammeroad
Zai von mie wel interressant
Dus zai schoof hom gaauw aan kaant
En as ik zai hou zai zo noast mie zit
Din is zai wel wat versleten
Mor zai gaait nog joaren mit

Kin Nait Sloapen

Kin nait sloapen
Schoapen binnen al teld vannacht
Boeten flaaiten vogels zacht
Terwiel k liedzoam op e mörgen wacht
En doch komt nije dag noch onverdachts

Kin nait sloapen
Aalwel doe in mien aarms ligst
Stoareg oazemst, ogen dicht
Daipe vree in dien gezicht
Terwiel ik nait wachten kin vannacht

Kin pas sloapen
As zunne bie t gerdien laangs gloept
Langzoamaan noar ogen kroept
Tot hoes ienainen in t licht verzoept
t Is doan mit nacht as hoane dag aanroupt